ମନ୍ମଥଙ୍କ ପାଇଁ ବାଟ କ୍ଲିଅର କରୁଛନ୍ତି ବାପା
ଗଲା ଭୋଟ ପୂର୍ବରୁ ଉତ୍ତରାଧିକାରୀଙ୍କୁ ନେଇ ଚାଲିଥିଲା ଘମାଘୋଟ ପାଲା। ଉତ୍ତର ପିଢ଼ିକୁ ଥଇଥାନ କରିବା ପାଇଁ ନେତାଙ୍କ ମଧ୍ୟରେ ଯେପରି ପ୍ରତିଯୋଗିତା ଚାଲିଲା ସେଥୁରୁ ହାତ ଦଳ ବି ବାଦ ପଡ଼ି ନ ଥିଲା । ହାତ ଦଳର ଢ଼େର ନେତା ନିଜ ପିଲାପିଲିଙ୍କୁ ନିର୍ବାଚନରେ ଓହ୍ଲାଇବାକୁ ସୁଯୋଗ ଦେଲେ । ହାରଜିତ୍ ତ ପଛ କଥା, ମାତ୍ର ଭବିଷ୍ୟତ ପାଇଁ ନିଜନିଜ ସ୍ଥାନ ପକ୍କା କରିଦେଲେ ।
ଆଗାମୀ ଭୋଟ ଢ଼େର ଦିନ ବାକିଥିବାବେଳେ ହାତ ଦଳର ବଡ଼ପାଟିଆ ନେତା ସୁର ଭାଇ ନିଜର ଉତ୍ତରାଧିକାରୀ ବାଛି ନୂଆ ଚର୍ଚ୍ଚା ଆରମ୍ଭ କରିଛନ୍ତି। ପାଇଲଟ୍ ପୁଅ ତାଙ୍କର ଉତ୍ତରାଧ୍ୟାକାରୀ ହେବେ ବୋଲି କେହିକେହି କହିଲେଣି । ପୁଅ ବି ମନା କରୁନାହାନ୍ତି, ବାପାଙ୍କ ଆଦେଶ ଶିରୋଧାର୍ଯ୍ୟ ବୋଲି ମଧ୍ୟ ସୂଚନା ଦେଇ ସାରିଲେଣି । କଥାଟା ଅବଶ୍ୟ ମନ୍ଦ ନୁହେଁ; ଗଲା ନିର୍ବାଚନ ବେଳେ ସୁର ଭାଇ ଏଥର ତାଙ୍କ ଶେଷ ନିର୍ବାଚନ ବୋଲି କହିକହି ଭୋଟ ମାଗିଥିଲେ । କଥାରେ ସୁରଭାଇ ପୁରା ପକ୍କା, ତେଣୁ ଭବିଷ୍ୟତରେ ଆଉ ନିର୍ବାଚନ ଲଢ଼ିବେ ନାହିଁ । ଘରମଣି କୁଆଡ଼େ ସୁରଭାଇଙ୍କୁ ଦିନକୁ କୋଡ଼ିଏ ଦେଉଛନ୍ତି ଆଉ ସେଥିରେ ରାଜନୀତି ଚାଲିଛି।
ସେଥିଲାଗି ପୁଅକୁ ଆଗାମୀ ଦିନ ପାଇଁ ପ୍ରସ୍ତୁତ କରାଇଛନ୍ତି। ଭୋଟବେଳେ ପୁଅ ନିଜ ସାଧ୍ୟମତେ ଭୋଟ ବୁଝାବୁଝି କରୁଥିଲେ । ଆଗାମୀ ଦିନରେ ନିଜ ଅଞ୍ଚଳ କଥା ବୁଝିବେ। ହେଲେ ଗୋଟାଏ କଥା ଖାଲି ଅବୁଝା ରହିଛି, ପୁଅ ଲଢ଼ିବେ କେଉଁ ପାର୍ଟିରୁ ? ବାପାଙ୍କ ପଦାଙ୍କ ଅନୁସରଣ କରି କଂଗ୍ରେସରୁ ଲଢ଼ିବେ ନା ଏଥୂପାଇଁ ଆଉ କିଛି ଯୋଜନା ଅଛି ?