ରାଧାଙ୍କୁ ହରାଇବା ପାଇଁ ଷଡଯନ୍ତ୍ର କରିଥିଲେ କି ପୂଜାରୀ ?

ପଦ୍ମ ଦଳିଆ ପୁରୁଖା ଆଉ ଟାଣୁଆ ନେତ୍ରୀ ରାଧାରାଣୀ ବ୍ରଜରାଜନଗର ଉପନିର୍ବାଚନ ପରାଜୟ ଭୁଲି ପାରୁ ନାହାନ୍ତି। ତାଙ୍କୁ ହରାଇବା ପାଇଁ କୁଆଡେ ତାଙ୍କରି ଦଳର ନେତାମାନେ ଷଡଯନ୍ତ୍ର କରିଥିବା ଅନୁବହବ କରି ରାଗରେ ରକ୍ତ ଚାଉଳ ଚୋବାଉଛନ୍ତି । ଯେତେବେଳେ ସୁଯୋଗ ପାଉଛନ୍ତି ଯାହାକୁ ପାଉଛନ୍ତି ତାକୁ ଶବ୍ଦ ବାଣରେ ରକ୍ତାକ୍ତ କରି ଦେଉଛନ୍ତି । ପୂର୍ବରୁ ବ୍ରଜରାଜନଗରରୁ ବିଧାୟକ ପ୍ରାର୍ଥୀ ହୋଇ ପରାଜୟର ସମ୍ମୁଖୀନ ହୋଇଥିବା ଏବର ବରଗଡ଼ ସାଂସଦ ସୁରେଶ ପୂଜାରୀ କୁଆଡ଼େ ତାଙ୍କ ପରାଜୟର ଖଳନାୟକ ବୋଲି ବିଭିନ୍ନ ସମୟରେ ଓ ବିଭିନ୍ନ ସ୍ଥାନରେ ରାଧାରାଣୀଙ୍କ ସମର୍ଥକ ପ୍ରଚାର କରୁଥିବା ଶୁଣାଯାଉଥିଲା । 

ମାତ୍ର ପଦ୍ମପୁର ଉପନିର୍ବାଚନରେ ପଦ୍ମ ଦଳ ପଛୁଆ ଗତିରେ ଚାଲିଥିବା ସମୟରେ ରାଧାରାଣୀ ସୁରେଶଙ୍କ ଉଦ୍ଦେଶ୍ୟରେ ଯେଉଁ ଧର୍ମାସ୍ତ ଛାଡ଼ିଛନ୍ତି, ତାହା ଦଳରେ ସୃଷ୍ଟି କରିଛ ପ୍ରଚଣ୍ଡ ବିସ୍ଫୋରଣ । ମହାଭାରତ ଯୁଦ୍ଧରେ ଜୟଦ୍ରଥଙ୍କ କଟା ମୁଣ୍ଡକୁ ତାଙ୍କ ବାପାଙ୍କ କୋଳରେ ପକାଇବାକୁ ଅର୍ଜୁନ ପ୍ରଚଣ୍ଡ ଶକ୍ତିଶାଳୀ ଅସ୍ତ୍ର ଛାଡ଼ିବା ପରି ରାଧାରାଣୀଙ୍କ ଧର୍ମାସ୍ତରେ ସୁରେଶଙ୍କ ସମ୍ମାନ ପଦ୍ମପୁରରେ ଧୂଳିସାତ ହୋଇଯାଇଥିବା କେହିକେହି ମନେ କରୁଛନ୍ତି । 

ରାଧାରାଣୀ ଆଗକୁ ବିଧାନସଭା ନିର୍ବାଚନ ବେଳେ ବ୍ରଜରାଜନଗରରୁ ତାଙ୍କୁ ଟିକେଟରୁ ବଞ୍ଚିତ କରିବା ପାଇଁ ଷଡ଼ଯନ୍ତ୍ର ଗତ ଉପନିର୍ବାଚନ କାଳରୁ ଆରମ୍ଭ ହୋଇଥିବା ରାଧାଙ୍କ ମନ୍ତବ୍ୟ ଦଳରେ ଯେ ସବୁକିଛି ଠିକ୍‌ଠାକ୍ ଚାଲି ନ ଥିବା ଖାଲି ସ୍ପଷ୍ଟ ହୋଇନାହିଁ, କେଉଁ ଶକ୍ତି ବଳରେ ରାଧାରାଣୀ ତାଙ୍କ ଆଡ଼କୁ ଅଙ୍ଗୁଳି ନିର୍ଦ୍ଦେଶ କରିଛନ୍ତି ତାହା ଘାଇଲା ପୂଜାରୀଙ୍କ ପାଇଁ ଅବୋଧ ହୋଇ ରହିଯାଇଛି।