ଡବ୍ଲ୍ୟୁ ଡବ୍ଲ୍ୟୁ ଏଫ୍ ଲଢ଼େଇରେ କୁସ୍ତିଆଳମାନେ ରିଙ୍ଗ ଭିତରକୁ ପଶିବା ବେଳକୁ ଯେପରି ରଡ଼ି କରି ପଶନ୍ତି ଠିକ୍ ସେମିତି ପଦ୍ମପୁର କୁସ୍ତି ଘଣ୍ଟି ବାଜିବା ବେଳକୁ ପଦ୍ମ ଦଳିଆ ବିକଟାଳ ରଡ଼ି କରି ମଇଦାନକୁ ଡେଇଁଥିଲେ । କୁସ୍ତିର ଧାର ଧାରି ନ ଥିବା ଦୁର୍ବଳିଆ ପ୍ରତିପକ୍ଷଙ୍କୁ ଏକାଥରକେ ଚିତ୍ କରିଦେବାକୁ ପୁରୁଣା ଦାଢ଼ିଆ ଖେଳୁଆଡ଼ଙ୍କୁ ମଇଦାନକୁ ଛାଡ଼ିଥିଲେ। ଦାଢ଼ି ନନା ବାହା ପିଟି ୩୦ ହଜାର ଭୋଟରେ ଜିତିବେ ବୋଲି ଘୋଷଣା କଲେ; ହେଲେ ଫଳ ବାହାରିବା ବେଳକୁ ଓଲଟା । 

ଶଙ୍ଖପତିଙ୍କ ଟନିକ ତାଙ୍କ ଦଳର ଦୁର୍ବଳିଆ କୁସ୍ତିଆଳଙ୍କୁ ଏମିତି ବଳୁଆ କରି ଦେଲା ଯେ ଫଳ ସମସ୍ତେ ଦେଖିଲେ । ତା' ପରେ କୁସ୍ତିଆଳ ତ କୁସ୍ତିଆଳ, ତାଙ୍କ ଗୁରୁମାନଙ୍କୁ ଆଉ ଦେଖିବାକୁ ମିଳୁନାହିଁ । ଘୋ ଘୋ ଡ଼ାକୁଥିବା ରାମମନ୍ଦିର ଆଖଡ଼ା ଏବେ ଶୂନଶାନ । ପଦ୍ମପୁର ଫଳ ନେଇ ଦିଲ୍ଲୀ ନେତା ଖୁସି କି ଅସୁଖୀ ତାହା ତ ଭିନ୍ନ କଥା, ହାତ ଦଳିଆଙ୍କ ଅବସ୍ଥା ଶୋଚନୀୟ ହୋଇଥିବାରୁ ଦଳର ନେତାମାନେ ଆଶ୍ବସ୍ତ । ତେଣୁ ଏଥିରେ ବ୍ୟସ୍ତ ନ ହେବାକୁ କୁଆଡ଼େ ଆଶ୍ୱାସନା ମିଳିଛି । ଖାଲି ସେତିକି ନୁହେଁ, ଦଳର ନେତାଙ୍କୁ ବଳ ଦେବାକୁ କୁଆଡ଼େ ଦଳର ରାଷ୍ଟ୍ରାଧ୍ୟାପତି ଜଗତପ୍ରକାଶ ନଡ୍ଡା ଓଡ଼ିଶା ଆସୁଛନ୍ତି। 

କୌଣସି ସଭାସମିତି ନ କରି କେବଳ ଦଳର ନେତାମାନଙ୍କୁ ନିର୍ବାଚନ ଜିତିବାର କୌଶଳ ଶିକ୍ଷା ଦେବେ । ତାଙ୍କ ସାଙ୍ଗରେ ବଂଶଲ ଓ ପୁରଦେଶରୀ ବି ଆସିବେ । ରୁଦ୍ଧ ଦ୍ବାରରେ ପ୍ରସ୍ତୁତ ହେବ ରଣନୀତି, ଫଳରେ ଦଳରେ ପରାଜୟକୁ ନେଇ ଯେଉଁ ‘ଷ୍ଟ୍ରାଟେଜି’ ବିବାଦ ଚାଲିଛି ତାହାର କୁଆଡ଼େ ସମାଧାନ ହୋଇପାରିବ ।