ଦୁର୍ଘଟଣାଗସ୍ତ ଯୁବତୀଙ୍କୁ ନିଜ ଗାଡ଼ିରେ ହସ୍ପିଟାଲ ନେଲେ ପାଣ୍ଡିଆନ

ପୁରୀ: ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭି. କାର୍ତ୍ତିକେୟନ ପାଣ୍ଡିଆନ ଶନିବାର ପୁରୀରୁ ଆସୁଥିବାବେଳେ ରାସ୍ତାକଡ଼ରେ ପଡ଼ିଥିବା ଜଣେ ଯୁବତୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରାଇଛନ୍ତି। ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।

ସୂଚନା ଅନୁଯାୟୀ, ଟିଭିଏସ୍ ଶୋ’ ରୁମରେ କାର୍ଯ୍ୟ କରୁଥିବା ହଳଦିଆର ଅନ୍ନପୂର୍ଣ୍ଣା ସାହୁ(୨୩) ନାମକ ଜଣେ ଯୁବତୀ ଏକ ମୋପେଡରେ ଯାଉଥିବାବେଳେ ମାଳତୀପାଟପୁର ବସଷ୍ଟାଣ୍ଡ ନିକଟରେ ଦୁର୍ଘଟଣାଗ୍ରସ୍ତ ହୋଇଥିଲେ। ତାଙ୍କ ମୋପେଡଟି ରାସ୍ତାକଡ଼କୁ ଛିଟିକି ପଡ଼ିଥିବାବେଳେ ସେ ମଧ୍ୟ ଗୁରୁତର ଭାବେ ଆହତ ହୋଇଥିଲେ। ଏହି ସମୟରେ ଶ୍ରୀ ପାଣ୍ଡିଆନ ଉକ୍ତ ରାସ୍ତାଦେଇ କାରରେ ଆସୁଥିଲେ। ଯୁବତୀ ଜଣକ ଅସହାୟ ହୋଇ ପଡିରହିଥିବା ଦେଖି ହଠାତ୍ ସେ ଗାଡ଼ି ଅଟକାଇଥିଲେ। ପରେ ରକ୍ତାକ୍ତ ଅବସ୍ଥାରେ ଯୁବତୀଙ୍କୁ ଉଦ୍ଧାର କରି ନିଜ କାରରେ ପୁରୀ ସଦର ଚିକିତ୍ସାଳୟ ଭର୍ତ୍ତି କରିଥିଲେ ଶ୍ରୀ ପାଣ୍ଡିଆନ।

ଶ୍ରୀ ପାଣ୍ଡିଆନଙ୍କୁ ଡାକ୍ତରଖାନାରେ ଦେଖି କର୍ମଚାରୀଙ୍କ ମଧ୍ୟରେ ତତ୍ପରତା ପ୍ରକାଶ ପାଇଥିବାବେଳେ କୁମ୍ଭାରପଡ଼ା ଥାନା ଆଇଆଇସିଙ୍କ ନିକଟରେ ଏ ସମ୍ପର୍କରେ ଖବର ପହଞ୍ଚିଥିଲା। ସେ ତୁରନ୍ତ ଡାକ୍ତରଖାନାରେ ପହଞ୍ଚିଥିଲେ। ଅନ୍ନପୂର୍ଣ୍ଣାଙ୍କୁ ଚିକିତ୍ସା ଯୋଗାଇଦେବାକୁ କହି ଶ୍ରୀ ପାଣ୍ଡିଆନ ଫେରିଥିଲେ। ଚିକିତ୍ସା ପରେ ଅନ୍ନପୂର୍ଣ୍ଣାଙ୍କୁ ତାଙ୍କ ଘରେ ଛାଡି ଦିଆଯାଇଛି।