କେବେ ଖୋଲିବ ସ୍କୁଲ, କେତେ କମିବ ସିଲାବସ୍?

ଭୁବନେଶ୍ୱର: ବିଳମ୍ବ ହେଉଛି ରାଜ୍ୟରେ ସ୍କୁଲ ଖୋଲିବା ନିଷ୍ପତ୍ତି। କରନା କଟକଣା ପାଇଁ ଅଗଷ୍ଟ ୩୧ ଯାଏ ସ୍କୁଲ ନ ଖୋଲିବାକୁ ନିଷ୍ପତ୍ତି ହୋଇଛି। ତେବେ ସ୍କୁଲ ଖୋଲିବା ଯେତେ ବିଳମ୍ବ ହେବ, ପାଠ୍ୟକ୍ରମ ସେତେ କମ ହେବ।

ସୂଚନା ଅନୁଯାୟୀ, ପୂର୍ବରୁ ସିବିଏସଇ ପାଠ୍ୟକ୍ରମ କମାଇବାକୁ ନିଷ୍ପତ୍ତି ନେଇସାରିଛି। ସ୍କୁଲ ଖୋଲିବା ପରେ ରାଜ୍ୟ ସରକାର ବି ପାଠ୍ୟକ୍ରମ କମାଇବାକୁ ନିଷ୍ପତ୍ତି ନେବେ ବୋଲି ଜଣାପଡ଼ିଛି। ସଂକ୍ରମଣ ଯେପରି ନ ବଢ଼େ, ସେଥିପ୍ରତି ରାଜ୍ୟ ସରକାର ଯତ୍ନବାନ ଅଛନ୍ତି। ତେଣୁ ଅନଲାଇନରେ କ୍ଲାସ ଚାଲିଛି। ମାତ୍ର ନୂତନ ଶିକ୍ଷାବର୍ଷ ଆରମ୍ଭ ନ ହେବାରୁ, ଦ୍ବନ୍ଦ୍ୱ ଉପୁଜୁଛି। ସିଲାବସ୍ ସମ୍ପର୍କରେ ବିଦ୍ୟାଳୟ ଓ ଗଣଶିକ୍ଷା ବିଭାଗର ପ୍ରମୁଖ ସଚିବଙ୍କ ମାଧ୍ୟମରେ ଯାଞ୍ଚ୍ ଚାଲିଛି। ତିନି ଏକ୍ସପୋର୍ଟ କମିଟି ରିପୋର୍ଟ ଦେଇଛନ୍ତି। ଏଇ ସପ୍ତାହ ସୁଦ୍ଧା ପିଲାଙ୍କ ଦ୍ୱନ୍ଦ୍ୱ ଦୂରହେବ। ତେବେ ସିଲାବସ୍ କେତେ ପ୍ରତିଶତ କମିବ ସେନେଇ ନିଷ୍ପତ୍ତି ହୋଇନି। ସିବିଏସଇ ସିଲାବସ୍ କାଟିବା ପରେ କିଛି ବିଷୟକୁ ନେଇ ଅନେକ ଦ୍ୱନ୍ଦ୍ୱ ଉପୁଜିଥିଲା। ତାହା ଯେପରି ନ ହେବ ସେନେଇ ନଜର ଦିଆଯାଉଛି। ସ୍କୁଲ୍ ଖୋଲିବା ଉପରେ କେତେ ପ୍ରତିଶତ ସିଲାବସ୍ କଟାଯିବ ତାହା ନିର୍ଭର କରୁଛି ବୋଲି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ କହିଛନ୍ତି।

ଚଳିତବର୍ଷ କରନା କଟକଣା ଯୋଗୁଁ ଶିକ୍ଷାକୁ ନେଇ ବହୁ ବାଦବିବାଦ ହୋଇଛି। ଏହାକୁ ଦୃଷ୍ଟିରେ ରଖି ସିବିଏସଇ ୩୦ ପ୍ରତିଶତ ପାଠ୍ୟକ୍ରମ କମାଇବାକୁ ପୂର୍ବରୁ ଘୋଷଣା କରିଛି। ତେଣୁ ଓଡ଼ିଶା ସରକାର ବି କମାଇବେ। ହେଲେ ସ୍କୁଲ ଖୋଲିବା ପ୍ରକ୍ରିୟା ଯେତେ ବିଳମ୍ବ ହେବ, ପାଠ୍ୟକ୍ରମ ସେତେ କମିପାରେ। ଚଳିତବର୍ଷ ସଡ଼କ ସୁରକ୍ଷାକୁ ଦଶମ ଶ୍ରେଣୀ ପାଠ୍ୟକ୍ରମରେ ସାମିଲ କରିବାକୁ ନିଷ୍ପତ୍ତି ହୋଇଥିଲା। ହେଲେ ସିଲାବସ୍ କମିବାକୁ ଥିବାରୁ ଏହା ମଧ୍ୟ ଅନିଶ୍ଚିତତା ଆଡ଼କୁ ଠେଲି ହୋଇଯାଇଛି।