ଅନୁଗୁଳରେ ମଦ ମୃତ୍ୟୁ ଘଟଣା: ଗଡ଼ିଲା ଚତୁର୍ଥ ମୁଣ୍ଡ

ବନ୍ତଳା: ଅନୁଗୁଳ ଜିଲ୍ଲା ପୁରୁଣାକୋଟ ଥାନା ଶରଧାପୁର ପଞ୍ଚାୟତ ପଥରଗଡ଼ ଗ୍ରାମରେ ଘଟିଥିବା ବିଷାକ୍ତ ମଦ ମୃତ୍ୟୁ ମାମଲାରେ ମଙ୍ଗଳବାର ଚତୁର୍ଥ ମୁଣ୍ଡ ଗଡ଼ିଛି। ସୋମବାର ପର୍ଯ୍ୟନ୍ତ ଘଟଣାରେ ୩ ଜଣଙ୍କର ମୃତ୍ୟୁ ହୋଇଥିଲା। ଆଜି ଆଉଜଣଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି।

ମୃତକ ହେଲେ ଉକ୍ତ ଗ୍ରାମର ପ୍ରମୋଦ ସାହୁ(୪୪)। ସେ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଥିଲେ। ଏହି ବିଷାକ୍ତ ମଦ ପିଇଥିବା ଆହୁରି ତିନିଜଣ ଲୋକ ଏବେ ବି ଗୁରୁତର ଅଛନ୍ତି।

ସୂଚନା ମୁତାବକ, ଏହି ଶ୍ରମିକ ଏବଂ ମିସ୍ତ୍ରୀମାନେ ସ୍ଥାନୀୟ ଅଞ୍ଚଳରେ ଏକ ଘରର ଛାତ ପକାଇବା କାମରେ ନିୟୋଜିତ ଥିଲେ। ମୃତ ପ୍ରମୋଦ ଭୋଜି ରାନ୍ଧିବା ପାଇଁ ସେଠାକୁ ଯାଇଥିଲେ। ଏହି ଛାତ କାମ ଜଣେ ଠିକାଦାର ନେଇଥିଲେ। ସେ ହିଁ ଶ୍ରମିକ, ରାଜମିସ୍ତ୍ରୀ ଏବଂ ରୋଷେୟାଙ୍କୁ ରନ୍ଧା ମହୁଲି ମଦ ଦେଇଥିବା ଗ୍ରାମବାସୀ ପ୍ରକାଶ କରିଛନ୍ତି। ଠିକାଦାର ହିଁ ଏକ ଜଙ୍ଗଲରେ ମଦ ରାନ୍ଧୁଥିବା ପଦାକୁ ଆସିଛି। ତେବେ ଏ ଠିକାଦାର କିଏ ଓ କେଉଁଠି ମହୁଲି ରାନ୍ଧୁଥିଲେ ତାହା ତଦନ୍ତ ପରେ ଜଣାପଡ଼ିବ ବୋଲି କୁହାଯାଉଛି।