ସିଏ ମୋ ଭାଇ ନୁହେଁ, ଆପଣଙ୍କ ପୁଅ…
ମାଉସୀ, ଚିହ୍ନି ପାରୁଛ ! ମଉସା ଜାଣିପାରୁଛ !… ମୁଁ ପଲ୍ଲବୀ, ମହାରଥୀଙ୍କ ଝିଅ । ପୂର୍ବରୁ ବାପାଙ୍କ ସହ ଆସୁଥିଲି । ବାପାଙ୍କ ପ୍ରଚାରରେ ବୁଲୁଥିଲି । ତମ ଘର ବାଟେ କେତେ ଥର ଯାଇଛି । ଆମ ପ୍ରଚାର ଗାଡି ଗଲା ବେଳେ ବାପାଙ୍କୁ ପରା ତମେ ଫୁଲ ଚନ୍ଦନ ଦେଇ ଗତ ଥର ବନ୍ଦେଇ ଦେଇଥିଲ ବିଜୟ ପାଇଁ । ଏଥର ବି ସେମିତି ଫୁଲ, ଚନ୍ଦନ ଦେଇ ବନ୍ଦାଣ କରିଦିଅ । ବାପାଙ୍କୁ ନୁହେଁ ଭାଇକୁ । କାରଣ ବାପା ଗଲାପରେ ଭାଇ ଛିଡା ହୋଇଛି । ତେଣୁ ଭାଇ ପାଇଁ ମୁଁ ଏଥର ପ୍ରଚାରରେ ଆସିଛି । ମାଉସୀ ଭାଇ ମୋର ତମ ପୁଅ ଭଳି । ତାକୁ ଆଶିର୍ବାଦ କର ସେ ଜିତିଯାଉ । ବାପା ଯେମିତି ତମମାନଙ୍କ ସବୁ କାମ କରୁଥିଲେ, ଭଲରେ ମନ୍ଦରେ ଛିଡା ହେଉଥିଲେ । ଭାଇ ବି ଠିକ୍ ସେମିତି ତମ ସହ ରହିଛି, ରହିଥିବ । ମଉସା ବାପା ଏବେ ବି ବଞ୍ଚିଛନ୍ତି, ଆମ ଗହଣରେ ଅଛନ୍ତି । ଭାଇ ଭିତରେ ତମେ ବାପାଙ୍କୁ ଦେଖିପାରୁଛ କି ନାହିଁ । ବାପାଙ୍କ ଅଧୁରା ସ୍ୱପ୍ନ ପୂରା କରିବାକୁ ସେ ସଙ୍କଳ୍ପ ନେଇଛି, ଦିନ ରାତି ଏକ କରି ସେ କାମ କରୁଛି । ସେ ଜିତିଲେ ବାପା ଉପରେ ଥାଇ ଖୁସି ହେବେ…କହିବେ ଯାହା ହେଉ ପିପିଲି ଡେଲାଙ୍ଗ ଲୋକଙ୍କ ସେବା ପାଇଁ ଏବେ ମୋ ପୁଅ ଜନତାଙ୍କ ସେବକ ସାଜିଛି । ଆସୁଛି ମାଉସୀ, ମଉସା ମନେଅଛି ତ, ମୋ ଭାଇର ଚିହ୍ନ… ଶଙ୍ଖ ଚିହ୍ନ…
କିଛି ଏମିତି ଢଙ୍ଗରେ ପିପିଲିରେ ପ୍ରଚାର ଆରମ୍ଭ କରିଛନ୍ତି ପ୍ରଦୀପ ମହାରଥୀଙ୍କ ଝିଅ ତଥା ପିପିଲି ପ୍ରାର୍ଥୀ ରୁଦ୍ର ମହାରଥୀଙ୍କ ଭଉଣୀ ପଲ୍ଲବୀ । ନିର୍ବାଚକୁ ଆଉ ମାତ୍ର ସପ୍ତାହେ ଥିବା ହାଇଭୋଲଟେଜ ପ୍ରଚାରରେ ଲାଗିପଡିଛନ୍ତି ଟିମ୍ ବିଜେଡି ସହ ଜୁନିୟମ ମହାରଥୀଙ୍କ ଜମ୍ବୋ ଟିମ୍ । ସ୍ତ୍ରୀ, ଭଉଣୀ, ଭିଣୋଇ ଏବେ କର୍ମୀଙ୍କୁ ନେଇ ଗାଁ ଗାଁ, ୱାର୍ଡ ୱାର୍ଡ ଖେଦିଯାଉଛନ୍ତି । ଭାଇ ପାଇଁ ଭଉଣୀ ଭୋଟ ଭିକ୍ଷା କରୁଥିବା ବେଳେ ସକାଳରୁ ସଞ୍ଜ ଯାଏଁ କ୍ୟାମ୍ପେନକୁ ଜୋରଦାର କରୁଛନ୍ତି । ଡୋରଟୁ ଡୋର ବୁଲି ବାପାଙ୍କ ଅଧୁରା ସ୍ୱପ୍ନ, ଭାଇର ମିଶନ କଥା କହି ଶଙ୍ଖ ଚିହ୍ନରେ ଭୋଟ ଦେବାକୁ ଲୋକଙ୍କୁ ମନାଉଛନ୍ତି ପଲ୍ଲବୀ ।
କେବେ ଖୋଲା ଜିପରେ ବସି ଭାଇ ପାଇଁ ପ୍ରଚାର କରିଛନ୍ତି ତ କେବେ ଗାଁର କୁନି ପିଲାକୁ ଧରି ତା ସହ ଖେଳି ଲୋକଙ୍କ ସିମ୍ପାଥି ଗୋଟାଇଛନ୍ତି । ସ୍ୱାମୀ ଅର୍ଦ୍ଧେନ୍ଦୁ ସେଲିବ୍ରିଟି ଥିବାବେଳେ ପଲ୍ଲବୀ ବି ଭାଇ ପାଇଁ କେଉଁ ସେଲିବ୍ରିଟି ଠାରୁ କମ ନୁହେଁ । ବାପା ଯେମିତି ପିପିଲିର ସୁନାପୁଅ ସାଜିଥିଲେ ଭାଇ ବି ପିପିଲି ଗେହ୍ଲା ପୁଅ ହେବ ସେ ନେଇ ମାରାଥନ ପ୍ରଚାର ଚଳାଇଛନ୍ତି ପଲ୍ଲବୀ । ଯାହା ଏ ଦୃଶ୍ୟ ବୟାନ କରୁଛି ।
ଅନ୍ୟପଟେ ସ୍ୱାମୀର ବିଜୟ ପାଇଁ ସ୍ତ୍ରୀ ବି ପ୍ରଚାର ମୈଦାନକୁ ଓହ୍ଲାଇଛନ୍ତି । ପ୍ରଦୀପ ମହାରଥୀ ଅମର ରହେ, ରୁଦ୍ର ମହାରଥୀଙ୍କ ବିଜୟ କାମନା କରି ଛାମୁଆ ନେତାଙ୍କ ସମେତ ନିଜ ସ୍ୱାମୀଙ୍କ ଅନେକ ରାଲିରେ ବୁଲୁଛନ୍ତି ଜାଗୃତି । ୭ ଦିନ ପରେ ପିପିଲି ପାଇଁ ପଡିବ ଭୋଟ । ହାତରେ ଆଉ ମାତ୍ର କମ୍ ସମୟ ଥିବାରୁ ବିଶ୍ରାମ ଟିକେ ନେବାକୁ ବେଳ ନାହିଁ । ସ୍ୱାମୀ ଜିତିଗଲେ ଶାନ୍ତିରେ ନିଶ୍ୱାସ ମାରିବେ ଜାଗୃତି । ଅନ୍ୟ ଦଳ ସହ ଟକ୍କର ଦେବାକୁ ସମସ୍ତେ ପ୍ରଚାରରେ ଲାଗିପଡିଥିବା ବେଳେ ମହାରଥୀଙ୍କ ଏକ ଫଟୋ ନିଜ ଫେସବୁକରେ ପୋଷ୍ଟ କରିଛନ୍ତି ରୁଦ୍ରଙ୍କ ପତ୍ନୀ । ଯେଉଁଥିରେ କାନ୍ଥରେ ଝୁଲିଥିବା ଏକ ବ୍ୟାନରରେ ମହାରଥୀଙ୍କ ଫଟୋ ଲାଗିଛି ଆଉ ରୁଦ୍ର ବାପାଙ୍କ ହାତ ସହ ମିଶାଇଥିବା ଦେଖିବାକୁ ମିଳିଛି, ଏମିତି ଲାଗୁଛି ସତେ ଯେମିତି ବାପାଙ୍କ ହାତ ଧରି ଜୁନିୟର ମହାରଥୀ କହୁଛନ୍ତି । ବାପା ! ତମେ ବ୍ୟସ୍ତ ହୁଅନି ମୁଁ ଅଛି ପରା, ତମ ପୁଅ ରୁଦ୍ର ଅଛି ପରା । ମୁଁ ଥାଉ ଥାଉ ଲୋକଙ୍କ ସେବାରେ କେବେ ବି ହେଳା କରିବିନି । ତମକୁ କଥା ଦେଉଛି ବାପା କଥା ଦେଉଛି…
ପିପିଲିବାସୀ କାହାକୁ କରିବେ ନିଜର, କାହାକୁ କରିବେ ପର । ଏପ୍ରିଲ ୧୭ରେ ଜନତା ରାୟ ଦେବାକୁଥିବା ବେଳେ ମେ ୨ରେ ଜଣାପଡିବ ପିପିଲି ପାଇଁ କିଏ ସବୁଠୁ ପରିଶ୍ରମ କରିଛି । ଯିଏ ଅଧିକ ପାଠ ପଢିଥିବ ସେ ହିଁ ପିପିଲି ପରୀକ୍ଷା ଜିତିବ ।