ବିମାନ ବନ୍ଦର ଗୋଲେଇ ଛକ କହିବ ବିଜୁଙ୍କ ବୀରତ୍ବର ଗାଥା
ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ପ୍ରିୟ ବିମାନ ଡାକୋଟା ପାଇବ ନୂଆ ଜୀବନ। କୋଲକାତାରୁ ଫେରି ଆସିବ ଭୁବନେଶ୍ୱର । ଦୀର୍ଘ ପ୍ରତୀକ୍ଷା ପରେ ଏ ଦିଗରେ ବଡ଼ ପଦକ୍ଷେପ ନେଇଛି ରାଜ୍ୟ ପରିବହନ ବିଭାଗ । ଡାକୋଟା ବିମାନକୁ ଓଡ଼ିଶା ଆଣିବା ପାଇଁ ପରିବହନ ବିଭାଗ ଡାକିଛି ଟେଣ୍ଡର । କୋଲକାତା ବିମାନ ବନ୍ଦରରେ ପଡ଼ି ରହିଥିବା ଡାକୋଟା (ଡିସି-୩) ବିମାନକୁ ଖୋଲି ଏହାର ଯନ୍ତ୍ରପାତି ଓ ବିଭିନ୍ନ ଅଙ୍ଗକୁ ଅଲଗା କରି ଭୁବନେଶ୍ୱର ଅଣାଯିବ । ଯେଉଁ ସଂସ୍ଥା ଟେଣ୍ଡର ନେବ, ସେ ଏହି କାମ କରିବ ।
ଭୁବନେଶ୍ଵର ଆଣିବା ପରେ ପୁଣି ଥରେ ବିମାନର ଯନ୍ତ୍ରପାତି, ପାର୍ଟସକୁ ଯୋଡ଼ା ଯାଇ ବିମାନ ଛିଡ଼ା କରାଯିବ। ଯାହା ଖରାପ ବା ନଷ୍ଟ ହୋଇଥିବ, ତାହା ବଦଳରେ ନୂଆ ଲାଗିବ। ପୂରା ନବକଳେବର ହେବ ଡାକୋଟାର । ଏସବୁ କାମ କରିବ ଟେଣ୍ଡରଧାରୀ ସଂସ୍ଥା । ଟେଣ୍ଡର ଆହ୍ବାନର ଶେଷ ତାରିଖ ୩୦ ଜୁଲାଇ । ଏହା ପୂର୍ବରୁ ପ୍ରି-ବିଡ୍ ବୈଠକ ହେବ। ବୈଠକରେ ଏହି ବିମାନକୁ କିଭଳି ଖୋଲି ଭୁବନେଶ୍ୱର ଅଣାଯିବ, ତାହା ଉପରେ ଆବେଦନକାରୀ କମ୍ପାନିମାନେ ନିଜ ନିଜର ଉପସ୍ଥାପନ ରଖିବେ।
ସମ୍ଭବତଃ ସଡ଼କ ପଥରେ ହିଁ ବିମାନ ଅଣାଯିବ । ଭୁବନେଶ୍ବର ଅଣାଯିବା ପରେ ବିମାନବନ୍ଦର ସମ୍ମୁଖ ଗୋଲେଇ ଛକରେ ବିଜୁ ବାବୁଙ୍କ ପ୍ରତିମୂର୍ତ୍ତି ନିକଟରେ ଥିବା ଖାଲି ଜାଗାରେ ଏହି ଡାକୋଟା ସଂରକ୍ଷିତ ରଖାଯିବ। ଏଭଳି ଢଙ୍ଗରେ ତାହାକୁ ରଖାଯିବ, ତାହା ସଭିଙ୍କ ନଜର ଟାଣିବ । ଡାକୋଟା କହିବ ବିଜୁଙ୍କ ବୀରତ୍ଵ କାହାଣୀ । ଏଥିପାଇଁ ସାଧାରଣ ପ୍ରଶାସନ ବିଭାଗ ଅଢ଼େଇ ଏକର ଜମି ଚିହ୍ନଟ କରିଛି। ମାତ୍ର ଏଯାବତ୍ ଭାରତୀୟ ବିମାନବନ୍ଦର ପ୍ରାଧିକରଣ (ଏଏଆଇ) ଏନ୍ଓସି ଦେଇନାହିଁ ।
ଏନ୍ଓସି ପାଇଁ ଦୀର୍ଘଦିନ ଧରି ପରିବହନ ବିଭାଗ ଏହି ଟେଣ୍ଡର ଆହ୍ବାନ କରିପାରିନଥିଲା। ମାତ୍ର ଏବେ ପରିବହନ ବିଭାଗ ନିଷ୍ପତ୍ତି ନେଲା, ଏନଓସି ପାଇଁ ଅପେକ୍ଷା କଲେ ପ୍ରକ୍ରିୟା ବିଳମ୍ବିତ ହେବ। ତେଣୁ ଏନ୍ଓସି ମିଳିବା ପୂର୍ବରୁ ଡାକୋଟାକୁ ଆଣିବା ପ୍ରକ୍ରିୟା ସାରିବାକୁ ସ୍ଥିର ହେଲା । ବିଜୁ ବାବୁ ଜଣେ ଦୁଃସାହସିକ ପାଇଲଟ ଥିଲେ। ତାଙ୍କ ବୀରତ୍ଵର ଗାଥା ଓଡ଼ିଶାରୁ ସୁଦୂର ଇଣ୍ଡୋନେସିଆ ପର୍ଯ୍ୟନ୍ତ ପରିବ୍ୟାପ୍ତ । ଏହାର ସ୍ମୃତି ସାଉଁଟି ରଖିଛି ଡାକୋଟା ବିମାନ। ଏହି ବିମାନ ଦୀର୍ଘ ବର୍ଷ ହେବ କୋଲକାତା ବିମାନବନ୍ଦରରେ ଖୋଲା ଆକାଶ ତଳେ ପଡ଼ିଛି । ଏହାକୁ ଓଡ଼ିଶା ଫେରାଇ ଆଣିବାକୁ ରାଜ୍ୟ ସରକାର ଅଣ୍ଟା ଭିଡ଼ିଛନ୍ତି।